Dari Johol Ke Bangi

Pra Sekolah

Den memang dibosa an di Mukim Johol. Mendapek pendidikan awal pun kek situ. Bermulo Pra sekolah di sekolah  Kebangsaan Nuri sampailah den sekolah darjah 6. Maso tadika tu, akak den darjah 6. Kalau tak silap den, eden antaro batch yang awal prasekolah tu. Memang main yo kojo eh. setiap pelajar ado rak masing masing.Rak untuk lotak pensel ko, kaler ko.. Dan setiap rak tu, ado la lambang buah buahan, den mahgin buah rambutan. Maso tu, yang paling hebat mainan Lego la. Sapo siap dulu, buleh main lego. Mako, copek copek la siap an .Ado soghang kawan ni, begobut lego. Abob mo fauzi. abob tumbuk Fauzi.Lopeh tu cikgu panggil abob, dio nyuruk dalam tandeh. kok dio baco ontah ingat ontah tidak la agak eh.Cikgu maso tadika dulu cikgu Fuziah. Maso dulu, sekolah eh tingkap eh tingkap kayu yang bosa tu. kok angin tiup osah sojuk eh. Apo yang sodap eh maso tadika ni, pukul 10 yo makan. Free lak tu. lopeh tu pukul seboleh dah buleh balik. Tompi sobab akak den darjah 6 maso tu, den nonggok yo la kek topi kelas eh. Akak den selalu suruh tunggu dio sobab kelas eh bolun habih.

Sementaro nunggu akak den balik, ado la beberapo orang yang bolun balik laie, main buaian la deh, main gelongsor la deh..dan kek sekolah ado astaka. situ pun budak budak ni goma main.lompek lompek tanggo la deh.main koja koja.Gaso den, ni jam tak dapek nak buek camtu laie. Mano tak eh, henpon yo kojo . dulu memang susah, majoriti kawan kawan den omak abah eh orgahng kampung, tak do yang kayo bona pun. Kok ado pun anak cikgu. Pagi pagi Arwah atuk den la ayang akan hantar den poie sekolah naik moto.lopeh tu atuk den poie motong gotah.

Hujung minggu, kekadang den ikut yo atuk den poie ladang gotah. Nolong ngupik.lopeh tu jua. atuk den kadang kadang jua kek kodai simat, kakdang kadang jua kek kodai air mawang. Maso. Den bukan oghang sonang, maso  pra sekolah, arawah atuk den la yang jago den. Arwah uwan dah meninggal pado maso den umur 5 tahun. Lopeh tu, arwah atuk la yang jago den dengan akak den sampai la dio menghombuihkan nafas yang terakhir maso den tingkatan 3. Maso masuk pra sekolah, umur  6 tahun.Den memang tak do dapek mano mano pendidikan awal pun. Masuk masuk pra sekolah tu la baru nak kona huruf dan numbo. Satu tabiat den sampai la sekarang iolah, den ni memang bukan jonih yang suko ponteng sekolah. Kalau domam sikit sikit tu den poie jugak la sekolah. Kalau dah toghuk bona barulah den cuti. Satu yo yang den tanam dalam diri den, kalau den tak poie sekolah, den akan ketinggalan walaupun sedikit. Mako, den akan cubo koka an sifat ni dalam menuntut ilmu.

Gambar den maso sekolah gondah. Den masih ingat namo namo kawan kawan den dalam gambar. Dimanokah mereko ni jam...

Penghujung Hidup Kito

Assalamualaikum.
Osah lamo eh den tak nulih dalam blog ni. Maso bukak email tadi, ado lak den tenampak kek draft email tu pasal blog den ni. eden nak buek post baru pun dah tak berapo ghoti. memulo den nak masukkan gamba, tapi tah camano tak dapek lak. Den tulih yo la apo yang teragak kek hati den. Cubo ambik 1 maso, ronungkan tangan kito, mato kito, bodan kito, akal pikiran kito, semuo eh sempurno cukup sipat. Alhamdulillah, kito masih laie diboghi kesempatan untuk menghirup udaro dan ado tenago untuk buek kojo, cubo bayangkan Allah tarik satu nikmat, contoh eh nikmat mato, camano gaso eh? osah tak dapek den nak mikir an doh. Kok cubo lolap mato tigo ko ompek minit, lopeh tu poie la jalan nak poie ambik barang, dapek tak jumpo jalan?

sobab tu kito kono bersyukur dongan apo yang ado kek kito ni. Camano kito nak bersyukur? den ni bukan ustaz tompi, yolah, kito ni sesamo insan, sesamo la ingat mengingat an kan..boto tak? Kito bersyukur ni dongan cara jangan kufur nikmat, kok ado joki lobih tu, bersedokah, keluar an zakat.. kalau ado orang yang memerlukan, kito tolong. lopeh tu, ibadat wajib kono jago. Sembahyang limo waktu kono jago.

Bab sembahyang ni pulak, banyak kito kono perhati an. Jangan nak sembahyang laju yo. baco bacaan tu boto boto, kok tomakninah tu, berhenti seketiko, kok sujud tu, baco tasbih tu pelahan laha, jangan macam catuk burung makan yo.Belajar maksud setiap perkataan yang kito baco dalam sembahyang. baru la khusyuk,. Den ni nasihat yo, sembahyang den pun samo yo deh, tompi den cubo la jugak blaja supayo paham apo yang diucap an tu.

Jauh melencong dah dari tajuk utamo. Tajuk kek ateh tu penghujung hidup kito. Apo bondo eh tu? Maksud den, kito semuo akan poie mengadap ilahi. Itu PASTI. den pun akan mati suatu hari nanti. tompi, dah siap ko boka nak ke sano? Boka tu la kito kono sedio an kek dunio ni. Amalan kito yo nanti akan jaawb semuo soalan mungkar nangkir nanti. Kok api dunio pun kito tak buleh tahan, camano la api nerako yang paneh eh berkali gando. Tak usah la kito kek dunio ni banggo bona dengan pangkat dan harto kito, sobab apo? sobab semuo tu akan kito tingga an maso mati nanti. Tigo perkaro akan mengiringi kito ke kubur iaitu Sanak saudaro, Harta dan amalan. duo akan balik dan satu yo yang itngga iaitu amalan.

Tak payah kito nak banggo kito ni kuek ko, banyak duit ko, gumah godang ko, keto godang ko, sobab gumah kito nanti tu la deh kubur kito. tak payah nak banggo keto kito mahal, sobab naik kerando yo kito nanti, tak payah nak banggo kito kuek sobab bilo mati nanti, nak angkek tangan pun tak buleh. apo tah laie nak mandi. Sesamo la kito ingat yang kito akan mati. Cukuplah Mati sebagai nasihat.

Sekian.

SOLAT

Setiap hari  kito wajib menunaikan solat..ado yang sobut semayang..tak kirolah apo sobutan eh, kito wajib menunaikan sehari limo waktu..

ponah den tedongar ado ustaz buek lawak kek surau maso beceramah, contoh dialog mo lombu..

Lombu lombu, ekau makan tak? "makan"Jawab lombu,..den pun makan yo..lombu lombu, ekau semayang tak? lombu jawab tak..den pun tak yo... ha, apo makno eh tu,...hahaha

bilo kito dah semayang, kito kono la boghi an 100% tumpuan atau lobih mudah sobut yo khusyuk..bukan maso semayang ni la bari teringat kek mano lotak kunci la..porut lapa la..semayang pulak jangan la copek copek..kok copek copek tu, khusyuk ko? kito nak ngadap tuhan ni, bukannyo memain..kok poie dating mo awek kemain smart, buek persedioan laie, kok semayang tu pakai singlet yo..tu sobab eh sunat kito pakai wangi wangian..

lopeh tu, semaso semayang pulak, kok nak khusyuk kito kono paham makno eh..bilo kito paham, laie mudah..setiap apo yang kito sobut tu, kito paham makno eh..baru la khusyuk..ni baco alFatiha pun satu hongap yo..camano kualiti semayang eh tu kan..

den ni tak do la baik bona mahupun pandai bona, tompi dah bepuluh tahun semayang, sepatah pun yang dibbaco maso semayang tak paham..belajar tinggi..macam macam formulo buleh hapal, ni makno dalam semayang yang tiap tiap hari baco pun susah..sehari limo kali tau kito baco. kek sini den ado nak kongsi an sikit makno bacaan dalam solat..dalam semayang ni ado bacaan wajib dan bacaan sunat..

tompi baco yo la semuo eh yo..mudah mudahan amalan kito diterimo..

http://chromosome.files.wordpress.com/2011/07/bacaan-solat-per-kata.pdf

Fecebook

Harini den nak ceghito tontang fenomena yang sodang melando negaro dan dunia ni.. kalau maso dulu yang glamer eh Friendster..tak buleh tingga, nak yo update, tompi nijam yang digilo gilokan oleh bedudak ni jam ialah facebook atau dalam bahaso melayu eh muko buku..sobut yo FB sapo tak tau..budak kocik pun tau..sebagai contoh eh gambar kek ateh tu ha..budak sekolah gondah pun jawab soalan latihan yg cikgu bagi macam kek ateh tu ..tompi nak buek camano, nak koba FB ni tak elok tak buleh jugak..dengan ado eh Fb ni, gamai kengkawan lamo dah jumpo balik..macam macam goman pun ado, dulu kurus cekoding, ni jam kemain tombam laie.hahah..ado lak yang kreatif tubuh an group..contoh eh, group yang den join skrg group Budak Johol..dapek la bebughak ngan org kampung den tanpo mengiro umo..sampai an hari gayo ni nak ado an jamuan hari gayo untuk group Budak Johol..prinsip budak johol den tengok ialah "tak do campur tangan politik"..kok tetiap hari negok kek group tu, ado yo la yang dibugak an..laie satu, FB ni pon baik sebona eh..den nengok, makin gami buek niago online..yo lah, buleh den kobaan 80% orang yang colik IT ado FB..den memulo maghin pun tyak goti main FB ni..tompi, Friendster den tau la.hahah..minggu lopeh den bukak Frenster, dah begubah dah gupo eh..dah tak macam dulu.gamba yang den upload pun dah tak do..tak goti den nak update dah.hahah...tu ceghito kebaikan,  :

keburukan eh lak bagi den, org goma bagitau hal diri  untuk tontonan umum..contoh eh, nak poie mandi,nak poie makan pun bagitau org..ado ko patut?banyak bondo yang den gaso org nak kan perhatian melalui FB ni..sobab tu dio post macam macam kek FB. fesbok ni juga buleh buek kito bocorkan banyak maklumat diri kek tontonan umum..contoh eh numbo telepon, gamba peribadi,alamat, kojo apo semuo eh ado..seelok eh, tak payah la lotak maklumat banyak bona..sonang org nak gayau kito nanti..bagi den..apo apo pun kito kono pandai guno an teknologi ni sebaik eh..kok tak do teknologi susah yo kan.. macam den tau guno komputer pon maso tingkatan limo. ado kojo Add math yang cikgu boghi..untuk jadi an lawa sikit, buek la kek komputer.tu pun numpang gumah kawan..nak naip keyboard, payah den nak koba, kemain lombab..alhamdulillah, ni jam ok la sikit komputer den ni..

seingat den dl, lopeh SPm, kawan kawan den ado yang poie kursus komputer kek pokan Tampin. den yo tak belaja..maleh la, bagi den, lelamo den tau yo nanti..maso masuk U pulak, maso sem 1,tahun 1..den masih laie paki disket sodangkan kawan den dah pakai pendrive..masotu kok sapo ado 512MB kemain bosa dah tu..ado 128MB pon banggo..yo la, den pakai disket yo laie..buek asgment pon pakai disket.,.ketinggalan boto den maghin..lopeh tu, makcik den bagi pakai komputer eh lak..window 95..org dah pakai window 2000 dah maso tu..tu la den kok bab teknologi ni lambek sikit..maso final year, org lain pakai laptop yang nipis nipis, tompi den boli komputer yang toba tu..nak format pun susah..laptop tu pun dah hilang kono curik maso den jadi felo maghin..nasib baik la tesis master den ado save dalam external hardisk..kok tak, nangih la den.hahaha...tah sapo la pencurik laptop pusako den tu..laptop yang toba tu pun nak curik ko?maso kejadian, den tak do..den baru abih buek pembetulan tesis master den..bilo dah siap, den nak keluar la untuk print, balik yo umah felo den tu, tgk2 laptop den hilang,laptop kawan den hilang, hp kawan den hilang..bukan joki..nak buek cemano kan..lopeh dah hilang laptop tu, solang beberapo minggu, den dapek mesej dari pengetuo kolej tersobut, semuo yang ado dalam mesej tu semuo eh fitnah..tak tau la, ado yang busuk ati kot tak goma den jadi felo..ado ko dio koba den ni suko keluarkan kato kato kasar ..cakap tinggi suaro pun den tak ponah..yolah, kok org tak suko ni, macam macam la dibuek eh kan..

solang 2 bulan, den pun begonti jadi felo, terus menyewo kek flat..first time (ceewah,cakap omputih.hahah)den duduk luar dan berdikari,tapi tak po den dah kojo maso tu..naik moto lagenda den tu yo..janji hati hepi..hahahah..eh, ni cito pasal fesbuk, tapi cito laptop kono curik pun den cito,tak po lah, tetibo terinagt laptop pusako tu..yo la, tesis degree,tesis master, sumo dio tolong den..den sayang boto laptop tu..tompi umah dah kono pocah, pencurik la yang ambik.heheh..ok lah, nanti kok ado ideo laie, den menulih laie yo..biasolah,.kok ado cerito satu tajuk meleret leret la cito eh kan..hahaha..wassalam..

p/s : kredit gamba yang den ambik dari FB orang yang den tak konali..mohon share yo..

Poso

Lamo boto den tak jongok blog den ni..sodar tak sodar, dah masuk hari ke 12 dah poso..bilo dikonang balik, maso yang berlalu ni memang copek.tak tegaso doh..den pun tak sangko, den dah kojo..seingat den, den macam kek tadika laie..den tadika kek SK Nuri..maso tu dipanggil Pra sekolah..den ingat laie, maso umur ompek tahun, arwah wan Jarah den bawak den poie tadi Kemas kek mawang..tompi tah camano den tadika kek SKN..maso tu Pra sekolah tu baru yo bukak..maso bulan poso, tiap tiap hari cikgu fauziah akan tanyo, sapo poso hari ni? den dengan banggo eh akan angkek tangan,..tiap tiap hari den poso, tompi balik gumah den makan la kan.hahahah....den ingat laie, maso darjah 1, den poso ber peringkat peringkat..hari pertamo poso setongah hari, hari seterus eh den poso sampai pkul 4, lamo lamo nak abis poso den dapek la poso ponuh...mulo mulo nak poso ponuh tu bukan sonang.. ado sekali tu, boli air soya paneh kek mawang, lun sompek sampai gumah laie den dah balun minam ateh moto ..heheh..laie satu, bilo terawih lak, den bukan main goma ikut arwah atuk dan wan den poie terawih..bukan semayang bona pun, memain yo lobih..kok time moreh tu, den goma boto nolong angkek jamba..ado satu hari tu, den tak bapo ingat, den nak makan kuih badak begondam..tah apo salah eh, den dobik wan den..balik tu apo laie, tali pinggang la makan eh..wan jarah den memang garang..tompi dio baik, gajin..arwah meninggal dunio pado 30 Mei 1992..meninggal ateh sejadah dengan telekung laie..wan meninggal  lopeh semayang asar..den maso tu poie kodai mo atuk den boli roti...kalau nak tulih apo yang den teringat memang banyak...tompi sobab cito poso yo kan..maso poso kocik kocik dulu pon best..yo la den kan budak kampung..potang potang poie duduk ateh pokok yang dah gobah sebolah gumah den sementaro nunggu waktu bebuko poso..kok lopeh zohor tu, den poie hontam mandi sungaibagai..macam macam den buek maso kocik kocik maghin..kiro dogil gak la den ni...tapi, sumo tu dah jadi konangan..kek kampung pon tak do sapo dah..tingga somak yo..kok balik pun, den poie umah wan kama..orang yang jago den lopeh den hilang segalo tompek begantung..Sekarang ni tah camano la poso kek kampung..budak budak kocik pon tak bapo gamai dah...terawih kek surau pon tah camano la goman eh..dulu surau kayu, ni jam dah jadi surau batu, bosa cantik..apo apo pun, sumo ado konangan maso poso...

kulumpo-KL tower

semalam 26 Jun 2011, eden ado tugasan yang diboghi an.. den kono jadi pengiring duo oghang profesor dari korea untuk bawak jalan jalan kek kulumpo..den bawak sogahng yo sobab kawan den yang den ajak tak larat koba eh..pagi tu, dalam pukul 10 den dah keluar poie jomput dio kek puri pujangga UKM..mulo mulo, lalu dopan istano negaro, den singgah jap, bawak prof tu begamba kek dopan istano negaro tu..ekau yang duduk kek malaysia lamo lamo ni, ponah ko begonti amik gamba dopan istano tu?mosti tak ponah kan?hahahah..lopeh tu den bawak poie ko muzium negaro kendian ko menaro KL..humangai, lamo boto den tak naik KL tower ni..dokek 16 taun gaso eh..last maghin den poie maso rombongan sekolah..yo la bebudak laie, mano ponah poie kelumpo..den ingat laie maso poie menaro KL maso rombongan maghin..gayat ke main..yo la..bebudak.hahah..lopeh abih rombongan, cikgu suruh buek laporan, sapo buek laporan tebaik, dapek hadiah, tompi apo pun tak do.sajo yo mongak eh..tak do sapo pun monang...sampai ni jam den ingat laie..kok ado cikgu baco blog den ni, kok janji mo murid, jangan bohong..ni ado satu laie cito,maso den darjah duo maghin pun ado cikgu janji kalau dapek 100 markah matematik dapek RM1 syiling..maso tu singgit kemain bosa nilai eh..den pun usaho la sungguh sungguh..bilo time den dapek 100% tak dapek lak..sampai ni jam den ingat..cikgu eh pun den ingat...

berbalik cito den poie kulumpo bawak Prof tu, bebuih mulut den cakap omputih..yo la, den ni kan budak kampung, mano la ghoti nak cakap omputih bona, tompi lopeh la dio nak jalan jalan kulumpo tu..lopeh naik menaro KL tu, dio nak makan lak.nak makan makanan Korea..yo la, dio oghang korea..mano den nak gabo an makanan korea ni. den bawak yo la KLCC, nasib baik jumpo..apo laie, dio yang belanjo, den makan nasi goreng korea yo la..tu pun dah RM25 sepinggan..gaso eh macam nasi goreng kek kodai mamak yo.hahha
..peh tu, prof tu tanyo, nak minam apo?beer buleh minam?den kato, mano buleh, den oghang islam..jadi minam air tembikai susu jus yo la..apo yang den suko, air eh boto boto fresh..kepado peniago, kok jual jus tu, jual la yang fresh, jangan lotak gulo...baghu boto..lopeh tu, den jenjalan KLCC kendian apo laie..balik la..hahah..sekian yo la den menaip yo...wassalam

kodai jahit baju

lamo den tak nulih kek blog ni..maklum la, blog ni bolun den bagitau sesapo..bia la jadi diari den yo..hahahha..tongahri tadi den poie kodai jahit, nak hantar beg yang den dah design sobab ado oghang hilangkan beg tu, den kono betanggungjawab..tompi, apo yang den tepeganjat iolah, akak kodai tu dah tak ambik apo apo tompahan dah..sobab banyak bona tompahan baju ghayo..lam ati den, gilo ko apo, bulan syaaban pun bolun laie, tompahan baju ghayo dah banyak..ai yo ai..mano la den nak cari kodai ni..ganti totap kono ganti..tompi den dah boli kain eh dah..dah design dah, tingga nak jahit yo laie...ai yo ai..gamba kek ateh ni takl do kono mengono yo..sajo yo den lotak ni.hahahhaha